1.烏龍馬評家
作曲：嚴華
作詞：羅寶生
合唱：森森‧杜平
(女白)喂馬評家呀，有乜好貼士呀？
(男白)明日嘅賽事複雜啲。
(女白)我相信你一定有心水嘅。
(男白)我點知邊隻贏定輸唧？
(女白)使乜秘密得咁交關呀。
(男白)畜牲好難靠得住嘅。
(女白)唔該你俾兩場連贏位我，免至我次次都鋪草皮呀。
(男白)唏！好啦，好啦，我怕左你啦，嗱，聽住喇。
(男唱)
正當熱門馬你買「高飛」，谷嘉佢擅騎「夜遊時」，
捉大冷吼吓隻「多利是」，標準嘅路程是「嘉驥」，
你提防隻沸馬「靚女」，執生阿鄭棣池隻「美人兒」，
衛林士騎「東方勇士」，天陰個地淋忌「真玩意」。
(女白)哎吔，你好似想靠害咁噃，啲咁嘅山埃貼士都敢俾我嘅。
(男白)吓，咁嘅貼士都話山埃？你都矇查查嘅，唔怕老實話俾
你聽呀，
邊個大師傅同我冇交情呀？個個馬房嘅練馬師都同我係
死黨嚟嗎，呢啲秘密貼士係佢哋俾我嘅，你千祈唔好
週圍話俾人聽添呀。
(女白)嘻嘻嘻，你好似搽左面懵膏咁噃，喂老老實實喇，究竟
係咪真？
(男白)哼！信不信由你。
(女白)聽你嘅貼士輸死人，你俾親隻隻都跑第四嘅，成日點紅
又點綠，又話識哂個班騎師，重話個個馬房都有交情，
週時車天又車地，好彩我有特別貼士啫。
(男白)咁唔該你話番俾我知喇。
(女白)嗱，聽住喇。
(女唱)
計我話今次爆隻「足水」，「仙姬」「女健兒」孖「樂趣」，
串落去「益友」拖「達利」，開心嘅連贏是「真趣」，
「盈餘」梅道人最孭飛，當心阿何華跑「騄駬」。
(合唱)
「皆大歡喜」真「順利」，「威水」中獨贏就孖「樂意」。
(男白)哈哈，犀利喇，你係得嘅。
(女白)梗係喇。
2.失去愛情的人
作曲：劉家昌
作詞：龐秋華
主唱：杜平
浮雲未散天昏暗，
星隱蔽冷月沉。
為憶念初戀愛人，
心底充滿愁恨。
從前共你心相印，
彷彿似鳥同林。
恨風暴一朝降臨，
更恨愛人已另嬪。
破碎了美好願望，
舊日艷事化夢痕。
憂鬱過一生，
情字不再問，
人已斷腸永被愁困。
破碎了美好願望，
舊日艷事化夢痕。
憂鬱過一生，
情字不再問，
人已斷腸永被愁困。
3.傍友，賢妻
作曲：姚敏
作詞：羅寶生
合唱：森森‧杜平
(男白)開門。
(女白)邊個呀？
(男白)重駛問嘅？梗係我啦。
(女白)唉！將近天光嗱。
(男白)吓！番親嚟你一定要教訓我噃。
(女白)唔係叫做教訓，不過見你晚晚都咁夜番，驚你捱壞唧。
(男白)壞都冇法，揾食噃。
(女白)要你咁辛苦，我點過得意呢？唉，你靠傍闊佬養家，
唔係辦法嘅。
(男白)哦！我傍到家肥屋潤都唔好？咁你要我點做至啱呀？
(男唱)
我成日傍個茅根竹，佢認我做心腹，佢大把身家好色好食，
真歡喜作局。
我成日傍個茅根竹，食着甚充足，樣樣都黐，借水最易，
全憑架步熟。
傍老細，要說話靈活，擅吹捧，作狀純服，
托拍功夫早已做齊，靠滾更純熟，
我賢內助，你唔知足，夜夜重兜督，未知我辛苦借錢過活，
你為人似舊木。
(女白)唉！總之我唔希望你靠茅根竹，借水過日子啦。
(男白)唉！我都知，不過冇錢冇辦法。
(女白)我唔係要你一朝發達，我想你用雙手，用腦筋，
切切實實從頭做起，
咁樣做人先至啱。
(男白)啱就啱，不過唔知做乜野好呢？
(女白)呢個問題慢慢想啦！最緊要你肯改過先至得。
(男白)咁呀。
(女唱)
你傍闊少，你做奴僕，做跟班，更受凌辱，靠借錢易趨向下流，
更憂心你隨俗，你求自立，宜知足，我願日日食餐粥。
(合唱)
共刻苦耐勞，兩夫妻努力，勤勞挽大局。
(女白)希望你浪子回頭金不換就好啦。
(男白)唉！有個咁好嘅賢妻，精神感召，我都應該要改過嘅。
(女白)咁就不枉我對你一番苦心咯。
4.冷暖情天
【原自日曲'柔「Yawara」'】
作曲：古賀政男
作詞：龐秋華
主唱：杜平
桃花開，憶起去年，
共你結識兩心牽，
無限情痴一見有緣，
真使我情懷添溫暖。
我對你痴心一片，
但得永共纏綿，
同浴情河上，
細語笑並肩，
甜如蜜愛心堅，
誰料如今竟生變。
情之火，不許再燃，
恨你到底愛不專，
蟬曳殘聲不記約言，
竟拋棄舊情心改變。
妳對我不該欺騙，
害得我恨綿绵，
流盡愁情淚，
似醉更似癲，
從前事化輕煙，
惟恨情天偏多變。
| 
.jpg)