2.鳳嬌姆仔的彼擔米粉炒(王俊傑)
作詞：王俊傑
作曲：王俊傑
編曲：王俊傑
伊孤孤單單單單一個人 踮佇市場角仔 排一擔米粉炒
出入內外的人 攏會聽著伊親切的叫聲 先生小姐囝仔兄 遮坐欲愛啥
無看見有人佮伊作伴 毋怎知影伊的身世是按怎
只有一隻跛腳的烏狗佮伊來作伴
一碗四神湯 一盤米粉炒 數十年來好天落雨攏佇遮
一碗四神湯 一盤米粉炒 阮攏叫伊鳳嬌姆仔
鳳嬌姆仔咧唸歌 較唸嘛是彼首歌 鳳嬌姆仔愛唸歌 較唸嘛是唸袂煞
伊講自古紅顏多薄命 紅顏多薄命
鳳嬌姆仔彼擔米粉炒 炒著無仝款人客的運命
鳳嬌姆仔彼擔米粉炒 炒著彼個毋知影名的烏狗兄
鳳嬌姆仔彼擔米粉炒，炒著歲月流轉的變化
鳳嬌姆仔彼擔米粉炒，炒著伊已經變白的頭鬃
鳳嬌姆仔彼擔米粉炒，炒著市場內外的喝聲
鳳嬌姆仔彼擔米粉炒，炒著怹囝佇籠仔內的哭聲
伊的故事阮到大漢才知影 伊自細予人做養女 大漢為著家庭去做酒家女
無疑故熟識彼個烏狗兄 生一個囝
現在予人判無期徒 佇籠仔內咧算日頭影
| 
